Onorevoli Prim Ministru,
Onorevoli Kap ta’ l-Oppożizzjoni,
Eċċellenzi,
Sinjuri,

Ninsab onorat li qed nippresiedi din iċ-ċerimonja fejn mhux biss qed infakkru l-ġrajjiet li sawru l-mixja Kostituzzjonali ta’ pajjiżna, imma qed nagħtu ġieħ u nuru l-apprezzament tagħna lil seba’ persuni li ħadmu qatiegħ, fid-diversi pożizzjonijiet li okkupaw, fl-interess u għall-ġid tal-poplu Malti.

Is-sebgħa ta’ Ġunju 1919 u l-ewwel ta’ Novembru 1921.  Żewġ appuntamenti ma l-istorja.  Waħda ma teżistix mingħajr l-oħra.  Is-sebgħa ta’ Ġunju 1919, jew kif inhu magħruf is-Sette Giugno, kien il-jum li xegħel ix-xrara lejn sistema ta’ demokrazija parlamentari  f’pajjiżna ħielsa mix-xkiel tal-barrani.  Kien jum li ssiġilla d-destin tal-poplu Malti.  Kien ukoll jum ta’ dieqa meta demm Malti nxtered fit-toroq tal-Belt.  Ma nistgħux ma nsellmux lill-erba’ eroj li mietu dakinhar u li isimhom jinsab imnaqqax b’ittri tad-deheb fl-istorja tagħna, Manuel Attard, Ġużeppi Bajada, Wenzu Dyer u Karmenu Abela. Lil qrabathom ngħidilhom, kunu kburin għax dak id-demm ma nxteridx għalxejn, serva biex dan in-nazzjon ikun verament ħieles u demokratiku.

L-ewwel ta’ Novembru 1921 kien ir-riżultat dirett ta’ dak li ġara fis-sebgħa ta’ Ġunju 1919. Kien jum li rrisponda għall-karba ta’ kunsiderazzjonijiet soċjo-politiċi. Dakinhar ġiet inawgurata l-Assembleja Leġislattiva taħt il-kostituzzjoni ta’ Self Government li tat lil Malta forma ta’ gvern responsabbli.  Dawn l-avvenimenti wassluna sal-21 ta’ Settembru 1964 meta Malta ħadet l-Indipendenza tagħha u għall-avvenimenti storiċi oħrajn li ġew wara, fosthom it-twaqqif ta’ Malta Repubblika fl-1974 u s-sħubija ta’ Malta fl-Unjoni Ewropeja fl-2004.  Dan kien iż-żmien meta l-Maltin raw it-twelid ta’ l-ewwel movimenti politiċi li kellhom iħallu marka qawwija fl-iżvilupp politiku tal-Gżejjer tagħna. Insellmu lil dawk kollha li taw sehemhom dak iż-żmien kif ukoll lil dawk li ġew warajhom u li nisġu l-istorja moderna ta’ żminijietna. Il-Maltin huma kburin bikom.

Għaliex qed ngħid dan kollu?  Nixtieq naħseb li dawn il-ġrajjiet ma nfakkruhomx darba fis-sena, imma jakkumpanjawna tul is-sena kollha. Dak li għandna illum ma ksibniħx b’kumbinazzjoni.  Il-ġenerazzjoni żagħżugħa għanda tieħu nota ta’ dan kollu.  Huwa importanti u neċessarju li x-xogħol u s-sagrifiċċji li saru minn missierijietna fil-passat ma jiġix reċiprokat b’apatija u b’nuqqas ta’ interess.  

It-tifkiriet tal-passat tagħna għandhom jimlewna b’aktar impenn u kuraġġ biex nilqgħu għall-isfidi tal-preżent u tal-futur.  L-iżvilupp tas-soċjeta` Maltija jiddependi ħafna u huwa regolat minn dak kollu li jsir fil-Kamra tad-Deputati.  Ir-rappreżentanti tal-poplu Malti jistħoqilhom kull rispett u nkoraġġiment biex iwettqu xogħolhom bl-aħjar mod.  Fil-passat, saru appelli biex tissaħħaħ l-awtonomija tal-Parlament kif ukoll jitwaqqfu l-istrutturi u l-faċilitajiet meħtieġa ħalli l-Parlament Malti jaddotta ruħu għaż-żminijiet ta’ llum.  Ma nistax ma naqbilx ma dan.  Kif ma nistax ma naqbilx max-xogħol fejjiedi li nbeda mis-Select Committee li ġie mwaqqaf biex tissaħħaħ id-demokrazija f’pajjiżna.  Nappella u nawgura li dan ix-xogħol ikompli u naraw ir-riżultat fil-futur qarib.

Nagħlaq billi nifraħ lis-seba’ personalitajiet li ħa jirċievu l-midalja li tfakkar l-anniversarju mir-Re-introduzzjoni tal-Gvern Responsabbli fl-1921.  Il-President Emeritus Dott. Edward Fenech Adami, Dott. Anton Tabone, Dott. Antoine Mifsud Bonnici, Dott. John Attard Montalto, is-Sur Claude Muscat, Prof. Josef Bonnici u Dott. Joe Borg li lkoll kellhom sehem importanti fl-iżvilupp tal-ħajja politika, ekonomika u soċjali ta’ pajjiżna.

Nirringrazzjakom.