Indirizz mill-E.T. Dott. George Abela, President ta’ Malta waqt riċeviment mogħti lill-Membri tal-Unions fl-okkażjoni ta’ Jum il-Ħaddiem.  Il-Ħamis 30 ta’ April 2009, fil-Palazz ta’ San Anton 

Sinjuri ħbieb tiegħi,

Nieħu gost nilqagħkom fost l-ewwel nies li ġejtu hawnhekk bħala mistednin tagħna.  Nieħu gost nilqagħkom, kemm individwalment, kif ukoll għal dak li tirrappreżentaw.

Għalija intom tirrapreżentaw id-dinja sħiħa tax-xogħol u b’hekk, lil Malta kollha.

Dan hu Jum il-Ħaddiem.  Dan hu Jum San Ġużepp Ħaddiem. 

Imma forsi wieħed jistaqsi x’hemm x’wieħed x’jiċċelebra f’Jum il-Ħaddiem fiċ-ċirkostanzi tal -lum?  Qegħdin fiż-żminijiet fejn is-sistema ekonomika globalment qed tgħaddi minn spażmi u reċessjonijiet li qed tħalli lill-investitur, l-azzjonist, dak li jaħdem għar-rasu u l-ħaddiem jaqilgħu daqqiet ta’ ħarta li forsi lanqas biss kienu ippreparati għalihom.  Pajjiżna m`huwiex ħieles minn dawn it-tempesti.

Pero` inħoss li huwa xorta waħda tajjeb li fl-okkażjoni ta’ Jum il-Ħaddiem niftakru fil-kisbiet li seħħew fid-dinja tax-xogħol.  Id-dritt li ma titkeċċiex għal xejn b’xejn mix-xogħol; id-dritt ta’ paga xierqa; id-dritt ta’ rappreżentanza u sħubija fit-trejdunjins jew f’għaqdiet koperattivi; id-diversi benefiċċji marbutin ma’ mard, maternita`, paternita`, irtirar.  Il-ftehim kollettiv li għandu s-saħħa ta’ liġi u kisbiet oħrajn li seħħew bil-pressjoni li l-ħaddiema stess wettqu matul is-snin direttament permezz tal-unjin tagħhom u indirettament permezz tal-partiti politiċi u gvernijiet li mexxew ‘l quddiem l-interessi tagħhom.

Dan ma jfissirx li qed ngħixu f’xi ġenna tal-art.  Niftakru f’dan il-jum f’dawk l-eluf ta` nisa, ħafna minnhom ommijiet li għadhom ma sabux il-mezz kif jistgħu jipparteċipaw aħjar fid-dinja tax-xogħol waqt li jkomplu jimpenjaw ruħhom fil-familji tagħhom.  Niftakru f’dawk il-ħaddiema li tilfu l-impjieg.  Niftakru f’dawk il-ħaddiema li qed jiġu sfruttati u f’dawk il-ħaddiema li korrew fuq il-post tax-xogħol u dawk li sfortunatament tilfu ħajjithom fuq il-post tax-xogħol.

Kollox ma’ kollox pero’ dan hu jum sabiħ f’kull kuntest li jitqies fih, kemm dak soċju-ekonomiku kif ukoll dak reliġjuż.

Fl-istess ħin hu jum li lili – ikolli nistqarr – qatt ma jonqos li jġibli miegħu ftit tad-diqa.

Ilni tul is-snin inħoss dieqa li dan il-jum hekk sabiħ, daqstant importanti, aktarx li jservi bħala jum ta’ element ta’ firda.

Minn ħafna snin kien – u sa ċertu punt, għadu – jissimbolizza firda fost dawk li għandhom x’jaqsmu mal-qasam tax-xogħol.

Bejn is-sidien u l-ħaddiema, minkejja li mingħajr iż-żwieg xieraq bejniethom ma jkunx hemm produzzjoni u provvista xierqa, bil-frott ekonomiku li dawn jagħtu ħalli jkun jista’ jinqasam fost kulħadd.

Saħansitra bl-iżjed mod stramb, dal-jum juri wkoll firda bejn dawk l-istess għaqdiet li jirrappreżentaw lill-ħaddiema, bejn it-trejdjunjins.

Minkejja li, jkunu fl-liema unjin ikunu, il-ħaddiema l-istess iridu jmiddu dirgħajhom u moħħhom għall-ħidma.

Mhux l-istess iridu jħabbtu ruħhom ma’ l-esiġenzi qodma u moderni tal-produzzjoni.

Mhux l-istess iridu jegħelbu l-istress li jġib miegħu kull impjieg, iridu jgħassu għat-theddid li jista’ jkun hemm għas-saħħa u s-sigurta’ fuq il-post tax-xogħol, theddid li l-forma tiegħu tinbidel skond il-kwalita’ tax-xogħol iżda li, xi ftit jew wisq, dejjem qiegħed hemm, jinbidlu kemm jinbidlu l-mezzi tal-produzzjoni.

Nistqarr magħkom li nara dawn il-forom ta’ firda bħala xi ħaġa ta’ l-ikbar ironija.

Għax il-firda hi l-oppost, il-kuntrarju, ta’ dak li għandu jfisser Jum il-Ħaddiem.

Jekk jissimbolizza xi ħaġa dan il-jum jissimbolizza l-għaqda.  U għalhekk naħseb li tifhmuni meta ngħidilkom li fid-diqa tiegħi jiena nsib faraġ minnha meta nwarrabha bi ħsieb ieħor sempliċi.

Ħsieb li nipproponih lilkom biex intom ukoll tikkunsidrawh u, nittama, taslu biex tilqgħuh. 

Jien naħseb fil-festi ta’ l-Ewwel ta’ Mejju bħala l-festi tal-għaqda.  U dak hu li jfisser għalija dan il-jum – huwa Jum il-Għaqda, xejn inqas u xejn iżjed. 

Għaqda bejn il-materjali u l-ispiritwali, għax jikkumplimentaw lil xulxin f’kollox.

Għaqda bejn is-sidien u l-ħaddiema, għax mingħajr xulxin m’huma xejn u bilfors li b’kooperazzjoni flimkien iridu jipproduċu prodotti u servizzi li mbgħad id-dħul minnhom irid jinqasam b’mod ġust għax inkella s-sistema tidħol fil-periklu li tikkrolla.

Għaqda fost ir-rappreżentanti tal-ħaddiema li – hi x’inhi l-kategorija li jirrapreżentaw u huma x’inhuma t-tattiċi li jużaw – dejjem u l-ħin kollu għandhom strateġija komuni – it-titjib fil-kundizzjonijiet ekonomiċi u fiżici tal-ħaddiema, il-ħarsien tal-postijiet tax-xogħol u t-tqassim ġust tad-dħul li jiġi miż-żwieġ bejn il-ħidma umana u l-għeġubijiet tat-teknoloġija u l-innovazzjoni.

Għaqda ikbar f’dan il-qasam milli jissimbolizza dan il-jum ma ngħidx li jista’ jkun hemm. 

Għalhekk nistedintkom bil-qalb biex flimkien, lejlet Jum il-Ħaddiem, niċċelebraw Jum il-Għaqda li – kif imfisser fl-Innu ta’ artna li ħallielna Dun Karm – għandu l-ħila jservi biex ikattrilna l-ġid u barka li lkoll neħtieġu u nixtiequ.  It-tama u x-xewqa tiegħi hi li fil-kriżijiet dinjija li għaddejjin minnhom u li lilna jistgħu u qegħdin jolqtuna tinħoloq xewqa komuni li tinbena kultura ġdida ta’ solidarjeta` u parteċipazzjoni responsabbli.

B’awguri ta’ għaqda, intennilkom il-merħba tiegħi.